2026-11-20
بث مباشر
إعلان
عاجل
المتفرقات

"مونولوغات غزة" في بيروت..."طيارة حاملة الناس ومسافرة ع المجهول"

وك

وكالات

01 كانون الأول 2023

إعلان
"غزة علبة كبريت واحنا عيدانها"... هكذا كتب أحد الفتية في نص من ثلاثين مونولوغاً كتبها أطفال بين الرابعة عشرة والثامنة عشرة، تحدثوا فيها عن تجاربهم الشخصية التي عاشوها في حرب 2010 وقُدمت يومها في أسلوب مسرحي في مدن عربية وعالمية وأضيفت إليها كتابات جديدة بعد العدوان الإسرائيلي العام 2014. مونولوغات كأنها كُتبت اليوم، لا شيء تغير، آلة القتل لم تتغير، والأطفال الذين كتبوا أحلامهم في مونولوغاتهم أصبحوا اليوم في العشرين والثلاثين من عمرهم... إن كانوا ما زالوا على قيد الحياة.وبمبادرة من مسرح "عشتار" في رام الله، ولمناسبة يوم التضامن مع الشعب الفلسطيني، أعيدت تلاوة هذه المونولوغات في توقيت واحد بين عمّان وبيروت. ألقيت المونولوغات في بيروت في مسرح "زقاق" ومسرح "المدينة"، بمشاركة مجموعة من المؤدين المحترفين والمتطوعين، إضافة إلى مجموعة من الممثلين اللبنانيين والفلسطينيين، بدعوة من مؤسسة "فضاء"، ومن المشاركين: طارق تميم، رائدة طه، برناديت حديب، عبد الرحيم العوجي، فاديا التنير، حسن لواساني، بشارة عطالله وآخرون.
تنوّعت النصوص، التي كُتب معظمها باللهجة العامّية، بين تسجيل يوميات الحرب والقصف الهمجي ومشاهد الدمار، وبين تأملات كلّ طفل في واقع غزة العام 2010، وهي نسخة طبق الأصل عن غزة اليوم. كتب محمود عفانة: "الحرب خلصت على الأرض، بس بعدها موجودة في رأسي". وكتبت أماني الشرفة: "غزة طيارة حاملة الناس ومسافرة ع المجهول، لا هي حاطه بالجنة ولا حاطه بالنار. إمتى راح تهبط، الله أعلم، ويمكن الناس تضل معلقة هيك لأعمار قد عمري مرتين.. كل الأيام هون زي بعضها، فش إشي جديد.. اللي منّام عليه منصبّح عليه.. أبسط إشي أنه الأماني والأحلام صعب تحقيقها في غزة. خصوصاً إذا كانت زي أمنياتي، إني أكون فنانة، أغني وأمثّل وأعزف... في غزة المعزوفة الوحيدة معزوفة الموت، والرقص ع الجراح".تنوع الأداء بين المسرحي والقراءة المحايدة التي قاربت النصوص باللهجات والعبارات الضاحكة، وقوطعت الكلمات بدموع المؤدين تأثراً بما كتب يومها وما يكتب لغزة اليوم من موت لأطفالها. كتبت الطفلة أماني وهي تسرد حكايتها مع الحرب: "أول ضربة كانت قصف الجوازات. طلعنا أنا وصاحباتي من الامتحان.. كان أول يوم من امتحانات الفصل الأول.. قعدنا قدام باب المدرسة نحكي ونستنى باقي صاحباتنا عشان نروح مع بعض.. فجأة صار في انفجارات وراء بعض.. انصدمت وحسّيت حالي راح أموت. هربنا وكنت خايفة كثير.. شفت النسوان بتجري وبتصرخ وبتلطم على وجوهها.. وأنا مش فاهمه إيش عم بصير. حسيت حالي مش قادرة أوقف على رجليي والدنيا لفت فيّ.. أغمي علي وبطلت أحس بإشي.. صحيت على صوت صاحبتي بتصحي في، وبتصرخ: "أماني بحياة الله تصحي"!.وعن ناس غزة والعلاقات والروابط الاجتماعية في الحرب كتب ابن السادسة عشرة: "لما بدت الحرب أبوي سكّر علينا الدار تسكيرة سودا من كثر ما هو خايف علينا.. بعد ساعتين زهقت. طلعت أمشي حوالين دارنا.. بس هاي المرة كان المشي غير.. صرت خايف أمشي قريب من السيارات أحسن ما تنقصف.. وطول الوقت راسي لفوق بتطلع ع السما، أحسن تيجي طيارة تقصفني وأنا مش داري.. كنت مرعوب مع إنه منطقة الصفطاوي ما كان فيها أحداث كثيرة. رجعت ع الدار أجري وكأني هارب من إشي مرعب، وظليت في الدار لحد ما خلصت الحرب... بعد الحرب تغيرت حياتي كثير.. علاقتي مع الناس والجيران صارت أحسن.. صرت معروف عند رجال الحارة، وبديت ألعب طاولة زهر مع الختيارية.. صرت طول الوقت برا الدار بعرفش أقعد فيها ولا دقيقة".هذا الوصف الدقيق لمجتمع غزة ستقطعه ضحكات خارجة من خوف الأطفال وسخريتهم من كل ما يجري حولهم. تكتب الطفلة تيماء من حي التفاح: "معكرونة، مجدّرة، شعرية، ومعلبات أشكال وألوان.. إشي صنع في المغرب، وإشي صنع في الصين.. ومن سيريلانكا والباكستان والصومال.. ومش مهم تاريخ الصلاحية.. في الحرب كانت كل الشوارع علب معلبات فارغة... كثير أولاد صغار انجرحت رجليهم من العلب الفاضية.. الاحتلال كان شن علينا الحرب أرض وسماء، وإحنا معلنين حرب شعواء على الأكل.. كنا نأكل في اليوم 100 مرة، كل ما نفتح عنينا من الساعة 6 الصبح لثاني يوم الساعة 6 الصبح وإحنا نأكل.. كنت أفكر ان بيتنا لحالنا هيك، بس لما سألت حكوا لي كل غزة انفجعت على الأكل وقت الحرب".ناس بيروت وعمّان قرأوا مونولوغات غزة وضحكوا وبكوا، على مخيلة طفولة سبق أن قامت بكتابة هذه المونولوغات في غزة قبل أكثر من عشر سنوات. يومها نزلوا بها إلى الشاطئ وحملوها في زوارق ورقية علّها تصل الى العالم... والرسالة وصلت.
ملاحظة: نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات. إن كل ما ينشر من مقالات وأخبار ونشاطات وتعليقات، لا تعبر بأي شكل من الأشكال عن رأي الموقع الذي لا يتحمّل أي أعباء معنويّة أو ماديّة من جرّائها.

التعليقات

لارسال تعليق يرجى تعبئة الحقول الإلزامية التالية

مقالات ذات صلة